Heimir Hallgrímsson segir að íslenska liðið sé komið með bakið upp við vegg og það muni fórna öllu til að ná fram góðum úrslitum gegn Króatíu í lokaleik riðlakeppninnar á þriðjudaginn.
Heimir ræddi við blaðamenn fyrir æfingu íslenska liðsins í Kabardinka í morgun. Þjálfari Króata hefur látið hafa eftir sér að hann muni ef til vill hvíla leikmenn fyrir leikinn gegn Íslandi þar sem þeir eru þegar öryggir með sæti í 16-liða úrslitum.
Þegar Heimir var spurður hvort erfiðara yrði að undirbúa íslenska liðið gegn því króatíska, vitandi það að lykilmenn muni hugsanlega vanta sagði Heimir að það skipti í raun engu máli hver spilar hjá Króatíu. Leikmannahópur Króata sé breiður og ógnarsterkur.
„Það er fundur í kvöld um Króatíu hjá okkur og uppleggið hjá okkur er að við stillum upp þeirra sterkasta liði. Við vitum það hvernig þeir spila og stillum upp svo öllum hinum sem voru ekki í byrjunarliðinu gegn Argentínu bara til að sýna að það lið er ofboðslega sterkt. Þá eyðum við bara þeirri umræðu. Það skiptir ekki nokkru máli hvort þeir hvíli einn, tvo eða sjö leikmenn,“ sagði Heimir og bætti við:
„Þeirra leikmenn eru að spila í bestu liðum í heimi og það breytist ekki mikið í þessu króatíska liði þó að frægustu nöfnin verði ekki þarna. Fyrir okkur breytir það ekki nokkru máli. Þetta er leikur fyrir okkur sem er þannig að við erum upp við vegg, við höfum engu að tapa, þó við fengjum tíu gul spjöld og tvö rauð þá skiptir það engu máli fyrir okkur og við munum berjast fyrir öllu. Svo sjáum við til í lok leiks hvort að það skili okkur einhverju. Við vitum að við erum ekki í bestu stöðunni í riðlinum en við höfum engu að tapa og munum fórna öllu í þennan leik.“