„Þetta var mjög svekkjandi í gær en við verðum bara að ná okkur eins og við getum og byrja að fókusera á næsta leik,“ sagði landsliðsmaðurinn Birkir Bjarnason fyrir æfingu landsliðsins í Kabardinka í morgun.
Birkir segir að stutt sé í næsta leik og standið á leikmönnum sé fínt þrátt fyrir vonbrigðin í gær.
„Fyrri hálfleikur var mjög fínn og solid. Við hefðum átt að ná að skora eitt mark og þegar það gerist ekki þá komum við inn í hálfleik nokkuð sáttir við fyrri hálfleikinn. Við ætluðum okkur að koma aftur út og vinna þennan leik en það gerðist ekki.“
Birkir viðurkenndi að það hafi verið erfitt að spila í þeim hita sem var í Volgograd í dag ,sérstaklega þegar leið undir lok leiks. „Maður var svolítið búinn þegar leið að leikslokum, hvort það hafi verið út af hitanum eða mörkunum veit ég ekki, en jú, það var erfitt.“
Birkir sagðist vera í fínu standi eftir leikinn í gær, sjálfur kveðst honum líða betur í líkamanum eftir Nígeríuleikinn en eftir Argentínuleikinn. Hann segist ekki hafa trú á því að það muni hafa áhrif að Króatar ætli að hvíla lykilmenn gegn Íslandi.
„Nei, ég held ekki. Við þurfum að einbeita okkur að okkur og vona að það sé nóg.“
Ísland og Króatía hafa mæst oft á undanförnum árum og segir Birkir að íslenska liðið þekki það króatíska út og inn. „Ég held að líkurnar séu fínar, við förum fullir sjálfstrausts inn í þennan leik.“