Bláa hafið er allsráðandi í Volgograd fyrir leik Nígeríu og Íslands. Ein helrauð markvarðatreyja stakk þó í stúf við aðrar og ekki síst fyrir áletrunina: „Messi 0, Hannes 1″. Eigandi treyjarinnar, Eyjamaðurinn Ólafur Guðlaugsson, var kátur í stuttu spjalli við blaðamann 433.is: „Ég fékk þessa rjúkandi úr prenti í gær,“ sagði Ólafur og staðfesti hið augljósa, að afrek Hannesar Halldórssonar er hann varði vítaspyrnuna gegn Messi yrði honum ofarlega í huga um ókomna tíð. „Hannes er minn maður. Marverðirnir eru vanmetnir. Ég kem frá Eyjum og við höfum átt frábæra markverði og kunnum að meta þá,“ sagði Ólafur og þuldi upp meistara eins Pál Pálmason, Friðrik Friðriksson og Birki Kristinsson.
Ólafur trúir því staðfestlega að gott gengi Íslands haldi áfram í mótinu. „Ég held að vinnum 2-1 í hörkuleik,“ sagði Ólafur. Hann sagðist hafa tilfinningu fyrir því að Gylfi Sigurðsson myndi opna markareikning sinn á HM og að fyrirliðinn Aron Einar Gunnarsson myndi skora sigurmarkið.