Gylfi Þór Sigurðsson spilaði allan leikinn fyrir Ísland í dag er liðið tapaði 2-0 gegn Nígeríu á HM.
Gylfi var að vonum svekktur í leikslok eins og aðrir leikmenn liðsins en staða Íslands er ekki of góð þessa stundina.
,,Við erum gríðarlega svekktir. Sérstaklega eftir fyrri hálfleikinn, við vorum fínir þar og vorum ólíkur okkur í seinni,“ sagði Gylfi.
,,Við vorum óþolinmóðir og vorum að reyna að vinna leikinn frekar en að vera rólegir og vera þéttir til baka. Hversu margar skyndisóknir þeir áttu í seinni, ég man það ekki.“
,,Við vissum að þeir hefðu engu að tapa og myndu selja sig dýrt í seinni en svo strax í byrjun þá fóru þeir í skyndisókn og skoruðu næstum því.“
,,Í fyrri hálfleik vorum við mjög fínir og sköpuðum fín færi úr föstum leikatriðum en ég veit ekki hvað gerðist í seinni. Þeir spiluðu sig alltof auðveldlega í gegnum miðjuma og út á köntunum.“
Gylfi klikkaði á vítaspyrnu í leiknum en hann segist ekki hafa breytt neinu áður en hann steig á punktinn í dag.
,,Ég vildi bara skora. Það er leiðinlegt þegar þetta fer eins og þetta fór en maður verður bara að halda áfram.“
,,Þetta var sama rútína og ég hef alltaf gert en því miður fór boltinn yfir.“
,,Með góðum úrslitum í dag hefði þetta nokkurn veginn legið fyrir okkur og líklegt að við færum áfram en við klúðruðum því og nú bíðum við eftir öðrum úrslitum og vinnum okkar leik.“