Eiður Smári Guðjohnsen hefur lýst því hvernig leikdagur lítur oftast úr hjá leikmönnum íslenska landsliðsins.
Ísland er nú bráðlega að hefja leik gegn Nígeríu á HM en hvað ætli strákarnir okkar séu að gera rétt í þessu?
Eiður er með svörin en hann er að sjálfsögðu markahæsti landsliðsmaður Íslands frá upphafi.
,,Allur undirbúningur er klár. Það er allt búið, það er búið að rúlla í gegnum allt, það er búið að fara yfir þetta á fundum, það er búið að fara yfir leikskipulag og menn vita hvað þeir eiga að gera,“ sagði Eiður.
,,Síðustu tvo klukkutímana fyrir leik þá fá menn að vera í sinni eigin rútínu. Mér fannst gott að vera látinn í friði og fékk að gera mitt.“
,,Sumir vilja leggjast á nuddbekkinn, aðrir vilja fara í gegnum teyjur og hlusta á tónlist. Svo þegar kemur að upphituninni þá hópast menn saman og hætta að vera í eigin horni.“