„Við höfum heyrt af mörgum sem hafa lent í vandræðum eftir að hafa týnt skráningarkortinu (migration card) sem maður fær við komuna til Rússlands,“ segir í Facebook-færslu frá embætti ríkislögreglustjóra.
Um er að ræða kort (sjá mynd neðst) sem allir fá við komuna til landsins, hvort sem ferðast er á Fan-ID eða vegabréfsáritun. Mjög mikilvægt er að passa upp á kortið og geyma það með vegabréfinu, að sögn ríkislögreglustjóra.
„Það þarf að framvísa þessu korti í vegabréfaakoðun þegar landið er yfirgefið. Ef ekki er hægt að framvísa því við brottför getur það leitt til sektar. Þá krefjast hótelin þess einnig að þessu sé framvísað við innritun.“
Ef kortið týnist þarf að fara á næstu lögreglustöð og óska eftir nýju. „Það er ferlegt vesen að standa í því og þessvegna brýnum við fyrir öllum að passa vel uppá þetta.“
Í Facebook-færslu sem Lögreglan á höfuðborgarsvæðinu birti í morgun kemur fram að fimm lögreglumenn séu í Rússlandi vegna HM til að tryggja öryggi íslenskra áhorfenda sem ætla að fylgjast með leik Íslands og Nígeríu. Bendir lögreglan á að margar gagnlegar upplýsingar megi finna á Facebook-síðu embættis ríkislögreglustjóra, til dæmis um mikilvægi þess að ferðalangar séu með öll skjöl og alla pappíra í lagi.
