Heimir Hallgrímsson landsliðsþjálfari segir ólíklegt að Jóhann Berg Guðmundsson komi til með að spila gegn Nígeríu á morgun. Þessi mikilvægi leikmaður varð fyrir meiðslum í síðari hálfleik gegn Argentínu og þurfti að fara af leikvelli. Meiðslin eru ekki alvarleg en þó þess eðlis að ólíklegt er að hann komi við sögu á morgun.
Þetta kom fram á blaðamannafundi landsliðsins sem nú stendur yfir í Volgograd.
„Það er mjög ólíklegt að Jói spili. Hann er betri en hann hefur verið, batnar með hverjum deginum, ég ætla að ekki að fara í feluleik með það en það er ólíklegt að hann spili,“ sagði Heimir sem bætti við að þetta breyti ekki neinum plönum að Jóhann sé ekki með.