Þýski blaðamaðurinn Daniel Schuler er hálf orðlaus yfir íslenska landsliðinu í knattspyrnu. Þó að frammistaða íslenska landsliðsins á vellinum heilli hann eflaust er það frammistaða liðsins utan vallar sem heillar hann jafnvel enn meira.

Eins og við greindum frá á dögunum sendu strákarnir nígeríska markverðinum Carl Ikeme falleg skilaboð í vikunni. Ikeme, sem er 32 ára markvörður Wolves á Englandi, greindist með krabbamein á síðasta ári og háir nú sína erfiðustu baráttu til þessa.

Jón Daði Böðvarsson lék með Ikeme hjá Wolves á sínum tíma og ef  markvörðurinn hefði verið heill heilsu hefði hann að öllum líkindum verið í hópi Nígeríumanna sem mætir Íslandi á föstudag. Frá árinu 2015 hefur hann leikið 10 landsleiki og staðið sig vel.

Jón Daði birti mynd á Twitter þar sem sjá má leikmenn íslenska liðsins halda á íslensku landsliðstreyjunni með nafni Ikeme. Allt landsliðið var með á myndinni en með henni vildu þeir sýna Ikeme stuðning og minna á að lífið er ekki bara fótbolti þar sem allt snýst um að vinna. „Við erum allir með þér, Ikeme,“ sögðu strákarnir.

Þetta fallega hugarfar strákanna hefur ekki farið framhjá mörgum og hrósar fyrrnefndur Daniel Schuler strákunum í hástert – segir þá vera heimsmeistara í að sýna samkennd, sem færa má rök fyrir að sé einn mikilvægasti þáttur mannlegrar tilveru; að geta stutt við bakið á náunganum á erfiðum stundum, bjóða fram aðstoð og vera til staðar.

Schuler nefnir myndina og veikindi Ikeme og segir: „Heimsmeistarar í samkennd, Ísland – engin spurning.“

Það er því ekki bara árangur Íslands innan vallar sem vekur athygli heimspressunnar, heldur ekki síður hugarfar þeirra og hegðun utan vallar sem vekur jákvæða athygli. Því ber að fagna.

Weltmeister nach Sympathiepunkten: Island – kein Zweifel. Dem an Blutkrebs erkrankten Torwart Nigerias, der aufgrund seiner Krankheit die WM verpasst, sendeten die Jungs um @jondadi beste Genesungswünsche aus Russland. ?? #WM2018 https://t.co/2SjFzMpJGp

— Daniel Schüler (@DanielSchueler) June 20, 2018