Hannes Þór Halldórsson, markvörður íslenska landsliðsins, sat fyrir svörum á blaðamannafundi í Kabardinka í morgun þar sem hann var spurður um ýmis atriði.

Óhætt er að segja að Hannes hafi átt býsna skrautlegan feril og árið 2003 var ekki margt sem benti til þess að hann ætti eftir fara fyrir þjóð sinni á heimsmeistaramóti, vera valinn maður leiksins í fyrsta leik og verja vítaspyrnu frá einum besta knattspyrnumanni sögunnar. Árið 2003 var Hannes á mála hjá uppeldisfélagi sínu, Leikni í Breiðholti, sem þá lék í 2. deildinni. Hannes var ekki fastamaður í liðinu en spilaði þó einn leik þar sem hann gerði slæm mistök.

Hannes, sem er kvikmyndagerðarmaður, var spurður að því hvort hann hafi einhverntíma leitt hugann að því að saga hans væri efniviður í góða kvikmynd og þá hver myndi hugsanlega leika hann.

„Ég hef verið spurður að þessu nokkrum sinnum, hvort það eigi að gera bíómynd og hvort ég geri hana sjálfur. Ég veit það ekki. Þetta er auðvitað ótrúlegt hvernig þetta hefur þróast, ég var ekki einu sinni að spila hjá Leikni árið 2003 þó ég hafi spilað einn frægan leik. Þetta er auðvitað löng leið að vera kominn hingað og eitthvað sem ég er stoltur af. Bíómyndapælingar, það verður bara að koma í ljós en það verður einhver annar að taka þann slag. Ég held að ég ætli ekki að fara skrifa bíómynd um sjálfan mig.“