Hörður Snævar Jónsson skrifar frá Rússlandi.

Alfreð Finnbogason framherji Íslands vonast eftir því að íslenska landsliðið geti fyllt í skó Jóhanns Berg Guðmundssonar.

Afar litlar líkur eru á því að Jóhann geti spilað gegn Nígeríu vegna meiðsla sem hann varð fyrir gegn Argentínu.

Íslenski hópurinn vill þó ekki staðfesta að Jóhann verði fjarverandi og kemur það í ljós á morgun.

,,Það er mikill skellur ef við erum að missa mann sem hefur verið fastamaður í 5-6 ár í landsliðinu,“ sagði Alfreð Finnbogason um góðan vin sinn.

,,Við vitum hvað hann getur og hann er að koma úr frábæru tímabili í ensku úrvalsdeildinni. Hann hefur unnið óeigingjarnt starf ryrir landsliðið, stundum sem vængbakvörður og stundum sem kantmaður.“

,,Það kemur maður inn og fær tækifærið og það er vonandi að sá sem kemur inn stígi vel í hans fótsport. Við höfum sýnt það síðustu ár að við erum að breikka hópinn, við getum vonandi leyst hann af hólmi.“