Óhætt er að segja að ákveðin þjóðhátíðarstemning hafi ríkt hjá stuðningsmönnum íslenska landsliðsins undanfarna daga. Meðfylgjandi myndskeið sýnir einmitt íslenska stuðningsmenn sem gengu kannski aðeins og langt í gleðinni í Moskvu á sjálfan þjóðhátíðardaginn.
Það var mexíkóski blaðamaðurinn Rodolfo Landeros sem birti myndskeiðið á Twitter-síðu sinni. Rodolfo er fréttamaður hjá Fox og eru fylgjendur hans á Twitter 185 þúsund. Það hafa því býsna margir séð myndbandið. Hann var staddur á hóteli í Moskvu daginn eftir leik Íslands og Argentínu þar sem fyrir voru stuðningsmenn Íslands og Mexíkó.
Gleðin var við völd og af myndbandinu að dæma datt einum íslenskum stuðningsmanni það snjallræði í hug að taka víkingaklappið með Mexíkóunum. Í stað þess að nota trommu, eða eitthvað annað, þá notaði hann stól sem hann sló nokkuð harkalega í gólfið. Á myndbandinu sést starfsmaður hótelsins ganga upp að honum og segja: „Excuse Me“ en stuðningsmaðurinn heldur áfram og klárar dagskrána, ef svo má segja.
Rodolfo birtir svo mynd af gólfinu eftir á og af henni að dæma urðu talsverðar skemmdir á gólfinu.
Í umræðum undir myndbandinu og myndinni segja fylgjendur Rodolfo að það sé gaman að sjá samstöðuna milli stuðningsmanna Íslands og Mexíkó „en aumingja starfsfólk hótelsins. Maður getur séð að þeim líður ekki vel í þessum aðstæðum.“
Rodolfo er síðan spurður hver hafi þurft að borga fyrir skemmdirnar. Rodolfo svarar að bragði: „Íslendingurinn þurfti að borga fyrir gólfið.“
The icelandic-mexican thunderclap. ⚡️#ISL ? #MEX #WorldCup pic.twitter.com/f6RMsIVAv7
— Rodolfo Landeros (@RodolfoLanderos) June 18, 2018
