Hörður Snævar Jónsson skrifar frá Rússlandi:
Hitinn í Volgograd á föstudag, þar sem leikur Íslands og Nígeríu fer fram á heimsmeistaramótinu í knattspyrnu, gæti náð allt að 34 gráðum. Þá eru líkur á að sólin muni láta sjá sig nær allan daginn.
Þá er skordýraplága að herja á borgina og mikið er af moskító í borginni.
Að því er fram kemur í frétt Mail Online þurfti Sky Sports að hætta við beina útsendingu fyrir utan hótel enska liðsins í borginni vegna moskítóflugna sem gerðu dagskrárgerðarmönnum lífið leitt. Þá kemur fram í fréttinni að skordýraeitri hafi verið úðað úr þyrlu á leikvanginn í Volgograd til að létta áhorfendum lífið í leik England og Túnis í gær. Þá hefur læknateymi enska liðsins keypt birgðir af efni sem á að halda flugunum frá fólki.
Ljóst má vera að steikjandi hiti er eitthvað sem leikmenn Nígeíu eru vanari en íslensku víkingarnir.
,,Ég held að það sé nokkuð ljóst að það er þeim í vil, það þýðir ekki að pæla í utanaðkomandi aðstæður. Við verðum bara að taka á því,“ sagði Kári Árnason leikmaður íslenska liðsins um málið.