Reiknað er með að Jorge Sampaoli muni gera miklar breytingar á liði sínu fyrir leikinn gegn Króatíu á fimmtudag. Liðsuppstilling Sampaoli var gagnrýnd nokkuð eftir jafnteflið gegn Íslandi á laugardag en Argentínumönnum dugar í raun lítið annað en sigur gegn sterku liði Króata.
Á æfingu liðsins í gær stillti Sampaoli upp þremur miðvörðum; þeim Gabriel Mercado, Nicolas Otamendi og Nicolas Tagliafico. Mercado lék í hjarta varnarinnar í stað Marcos Rojo sem átti slakan leik gegn Íslandi í fjögurra manna vörn.
Þá var þeim Lucas Biglia og Angel Di Maria, sem báðir áttu slæman dag á laugardag, skipt út. Biglia fyrir Marcus Acuna sem stillt var upp á vinstri vænginn og Di Maria fyrir Cristian Pavon sem átti ágæta innkomu þegar hann kom inn á sem varamaður á laugardag.
Útlit er fyrir að Javier Mascherano verði áfram í stöðu djúps miðjumanns en Eduardo Salvio, sem lék í stöðu hægri bakvarðar, verður vængbakvörður og færist örlítið framar á völlinn.
Það að Sampaoli stilli ekki upp sama liðinu tvo leiki í röð er ekkert nýtt og virðist hann enn vera að finna réttu blöndina. Í síðustu tólf leikjum argentínska liðsins hafa sömu ellefu leikmennirnir aldrei byrjað tvo leiki í röð.
Lionel Messi, Willy Caballero, Maximiliano Meza og Sergio Aguero verða að líkindum allir í byrjunarliðinu gegn Króatíu.