Hörður Snævar Jónsson skrifar frá Rússlandi:
Heimir Hallgrímsson landsliðsþjálfari Íslands hefur greint frá þvi af hverju hann fór í smá fýlu fyrir leikinn gegn Argentínu. Morgunblaðið segir frá.
Hann sagðist hafa farið í fýlu tveimur dögum fyrir leik en þá hafi fólkið í kringum hjálpað til.
,,Ég hef flottan hóp í kringum mig, bara allir í kringum mig. Maður hefur stuðningsnet, ég fór í fýlu í gær en það voru menn sem pikkuðu mig upp, hristu mig til aðeins,“ sagði Heimir degi fyrir leikinn við Argentínu.
Hann gaf upp ástæðu þess svo í samtali við Morgunblaðið af hverju hann fór í fýlu.
„Þegar spennan er að byggjast upp þá eru það oft litlir hlutir sem verða til þess að pirra mann. Þess vegna er svo mikilvægt að það sé allt á hreinu og allt undirbúið. Það var einhver skjávarpi sem að klikkaði, og mér fannst það ekki vera viðeigandi í aðdraganda leiks á HM að landsliðið væri með bilaðan skjávarpa,“ sagði Heimir um málið við mbl.is.
Hann sagði svo að málið hefði leyst afar fljótt en mikilvægt er að allur undirbúningur liðsins gangi smurt fyrir sig.