Egill Helgason, sjónvarpsmaður á RÚV skrifar skemmtilegan pistil á Eyjunni í gær. Hann er staddur í sumarfríi í Grikklandi.
Þar fylgjast menn vel með HM og Grikkirnir voru ánægðir með Alfreð Finnbogason eftir mark hans í 1-1 jafnteflinu gegn Argentínu.
„Finnbogason hrópuðu þeir til okkar gömlu karlarnir sem drekka saman hér á einu götuhorninu á hverju kvöldi. Þeir þekkja nafn Alfreðs síðan hann spilaði um tíma með Olympíakos, liðinu frá hafnarborginni Piraeus,“ skrifar Egill í pistli sínum.
,,Fóru alveg rétt með nafnið þótt það sé langt og ekki alveg auðvelt í framburði. En grísk nöfn eru reyndar oft mjög löng líka..“
Það var síðan kaffibollinn í morgunmatnum daginn eftir leikinn við Argentínu sem gladdi Egil.
,,En svona var okkur fagnað í morgunkaffinu á veitingahúsi Nikosar í morgun. Þar starfar kona sem er mikill listakaffiþjónn. Þessi bolli var borinn á borð fyrir okkur og kom skemmtilega á óvart.“