Áslaug Arna Sigurbjörnsdóttir, þingkona og ritari Sjálfstæðisflokksins er ekki ánægð með Lionel Messi leikmann Argentínu.
Messi sagði í viðtölum eftir 1-1 jafntefli gegn Íslandi á laugardag á HM að íslenska liðið hafi ekkert gert.
„Þetta íslenska lið gerði eiginlega ekki neitt.“ Einmitt. Messi hefur greinilega ekki lært neitt af hinum tapsára kollega sínum, Ronaldo, á EM í fótbolta sumarið 2016,“ skrifar Áslaug í pistli sem hún birtir á Facebook.
Ronaldo fór einnig að væla yfir leikstíl Íslands þegar liðið gerði 1-1 jafntefli við Portúgal á EM.
,,Þetta lið gerði nefnilega mjög margt í þessum leik á laugardaginn. Fyrir utan að skora mark, verja víti og pakka í stórkostlega vörn sem Messi og félagar réðu einfaldlega ekkert við gladdi íslenska karlalandsliðið í fótbolta þjóð sína og sameinaði um allt land – og erlendis. Íslendingar fylltu bari á Spáni og í Washington. Fólk sem vissi ekki að það hefði nokkurn áhuga á knattspyrnu stóð sig að því að öskra sig hást á sjónvarpsskjáinn, fagna stórkostlega þegar markið kom og varpa öndinni léttar í hvert sinn sem skot geigaði eða Hannes varði.“
Áslaug segir að karla og kvennalndsliðið séu fyrirmyndir fyrir annað fólk.
,,En þetta er bara ein hlið á þessu öllu. Það sem þessir strákar og stelpur í landsliðunum okkar kenna okkur er að ekkert er ómögulegt og eru þannig frábærar fyrirmyndir. Það á að vera ómögulegt fyrir örþjóð eins og okkur að eiga landslið sem keppa við þá bestu og standa sig vel í fótbolta, handbolta og öðrum íþróttagreinum. En þetta snýst um það að setja sér markmið og trúa því að við höfum það sem til þarf. Maður kemst nefnilega sjaldan lengra en maður ætlar sér.“
Pistill Áslaugar er í heild hér að neðan.