Hannes Þór Halldórsson var maður leiksins þegar Ísland gerði 1-1 jafntefli við Argentínu í gær. Hannes varði meðal annars vítaspyrnu frá Lionel Messi, sem að margra mati er besti knattspyrnumaður sögunnar. Hannes hefur því væntanlega getað lagst sáttur á koddann í gærkvöldi.
Meðfylgjandi mynd getur Hannes líka haft til hliðsjónar og sýnt barnabörnunum þegar fram líða stundir. Hún sýnir nefnilega býsna magnaða tölfræði hans gegn Lionel Messi og Cristiano Ronaldo. Messi og Ronaldo hafa borið höfuð og herðar yfir aðra knattspyrnumenn á undanförnum árum og nánast skorað mörk að vild. Þeir eru tveir markahæstu leikmenn í sögu Meistaradeildarinnar, hafa unnið titilinn besti knattspyrnumaður heims mörg undanfarin ár og eru markahæstu leikmenn sinna þjóða frá upphafi.
En það er eitt sem þeir hafa ekki afrekað. Það er að koma knettinum framhjá Hannesi Þór Halldórssyni, markverði íslenska landsliðsins, á stórmóti. Eins og meðfylgjandi mynd ber með sér átti Messi ellefu skot á markið í gær en skoraði ekki. Þegar Ísland mætti Portúgal á EM 2016 átti Ronaldo einnig ellefu skot á markið en, eins og Messi, mistókst honum að skora.
Ekki lítið afrek gegn tveimur langbestu knattspyrnumönnum sinnar kynslóðar.