Hörður Snævar Jónsson skrifar frá Rússlandi:
Það eru líkur á því að kantmaðurinn knái, Jóhann Berg Guðmundsson spili ekki meira með Íslandi á Heimsmeistaramótinu í Rússlandi.
Jóhann meiddist á kálfa í leiknum gegn Argentínu í gær og þurfti að fara af velli.
,,Hann fór á sjúkrahús í myndatöku áðan, við þurfum að sjá hversu stór þessu meiðsli eru. Fyrsta sem okkur dettur í hug er að hann sé frá í einhvern tíma,“ sagði Heimir Hallgrímsson þjálfari liðsins í dag.
Jóhann gæti því lokið keppni en hann er einn mikilvægasti leikmaður liðsins. ,,Ég veit ekki hvort HM sé búið, þetta lítur ekki vel út í dag. Þetta er oft verst svona fyrst daginn eftir, fyrstu fréttir eru að þetta lítur ekki vel út.“
,,Við viljum ekki missa neinn leikmann út, Jói er búinn að spila alla leikina okkar. Hrikalega stór póstur í okkar leik.“