Hannes Þór Halldórsson markvörður Íslands öðlaðist heimsfrægð í gær með frammistöðu sinni gegn Argentínu á HM.
Hannes varði ekki bara vítaspyrnu frá Lionel Messi í 1-1 jafnteflinu, heldur var hann öflugur allan leikinn.
Hannes gekk í raðir Randers sumarið 2016 en nú gæti sú dvöl tekið enda, félagið hefur ekki undan við að svara símtölum. Stærri lið hafa áhuga á að fá Hannes sem er 34 ára í sínar raðir.
,,Það hafa komið margar fyrirspurnir eftir leikinn en ekkert tilboð, við bíðum eftir þeim,“ sagði Soren Pederen yfirmaður knattspyrnumála hjá Randers við danska fjölmiðla.
,,Við viljum hafa hann í Randers, við sjáum hvað gerist. Ef það kemur bæði spennandi tilboð fyrir Randers og Hannes, þá verður það skoðað.“
Það er því ljóst að Randers væri tilbúið að selja Hannes en aðeins fyrir rétt verð sem hækkaði hressilega í gær.