„Þetta var sem betur fer hægri. Ef hann hefði náð mér á vinstri hefði hann sennilega klárað mig,“ sagði Aron Einar Gunnarsson, fyrirliði íslenska landsliðsins, á æfingu Íslands í Gelendzhik í morgun.
Einkennilegt atvik átti sér stað í leiknum gegn Argentínu í gær þegar dómari leiksins steig ofan á hægri ökklann á Aroni. Um algjört óviljaverk var að ræða, vitanlega, en Aron segir að honum hafi þó brugðið.
„Þetta var sem betur fer hægri, ef hann hefði náð mér á vinstri hefði hann sennilega klárað mig. Mér var brugðið aðallega, svo fór ég niður því þeir ætluðu að taka snögga aukaspyrnu og voru búnir að liggja aðeins á okkur.“
Aron sagði að dómarinn, Pólverjinn Szymon Marciniak, hafi beðið hann afsökunar. Honum hefði einnig brugðið enda líklega aldrei tæklað leikmann svona áður.
