Strákarnir okkar skarta margir hverjir stórum og miklum húðflúrum sem eru jafn misjöfn og þau eru mörg. Húðflúrið sem Arnór Ingvi Traustason er með á vinstri handleggnum vakti þó athygli blaðamanns en þar má meðal annars sjá andlitsmyndir af fólki sem staðið hefur við bakið á Arnóri Ingva í gegnum súrt og sætt.
„Þetta eru semsagt foreldrar mínir hérna og svo er ég með systkini mín hérna aftan á. Og svo táknar þetta ömmu mína og afa,“ sagði Arnór sem kveðst svo hafa fyllt upp í myndina með flúri sem honum fannst flott.
Það má því segja að fjölskyldan fari með Arnóri hvert sem hann fer. „Alltaf með fjölskylduna með mér. Hún er það mikilvægasta.“