Landsliðsmaðurinn Ari Freyr Skúlason segist mæta undirbúinn fyrir leikinn gegn Argentínu eins og hann muni byrja leikinn. Þetta sagði Ari í viðtali fyrir æfingu landsliðsins í Gelendzhik í morgun en eftir hádegi heldur liðið svo til Moskvu þar sem leikurinn gegn Argentínu fer fram á laugardag.
Hann og Hörður Björgvin Magnússin hafa barist um vinstri bakvarðarstöðuna að undanförnu og gera báðir tilkall til að byrja. Aðspurður hvort hann telji svo að hans styrkleikar muni nýtast betur fyrir leikinn gegn Argentínu sagði Ari;
„Ég ef ekkert pælt þannig lagað í því. Ég mæti undirbúinn eins og ég sé að fara spila og svo er það undir þjálfaranum komið hvernig hann velur. Að hafa hausinn í lagi er númer eitt, tvö og þrjú, hvort sem það er að hoppa inn á eða hvort maður byrjar. Þetta er bara undir þjálfaranum komið.“
Ari sagðist enn fremur ekki hafa neinar sérstakar áhyggjur af stöðunni á Aroni Einari Gunnarssyni sem hefur glímt við meiðsli að undanförnu. „Það eru ennþá þrír dagar í þetta. Hann lítur vel út og er fit. Þannig að ég hef ekki áhyggjur af líkamlegu ástandi hans,“ sagði Ari og bætti við Aron hefði tekið fullan þátt í æfingunni í fyrradag. Hann hafi litið vel út en Ari benti þó á og glotti að fyrirliðanum hafi ekki tekist að sóla hann á æfingunni.
Viðtalið við Ara má sjá hér að neðan: