Bresk yfirvöld hafa bannað rúmlega tólf hundruð stuðningsmönnum enska landsliðsins að ferðast til Rússlands á heimsmeistaramótið í fótbolta. Þessi ákvörðun er tekin af ótta við að þessir einstaklingar verði til vandræða í Rússlandi.
Þetta sagði Dan Roan, íþróttaritstjóri BBC, á Twitter í morgun og bætti hann við að ákvörðunin væri tekin af lögreglu og breska innanríkisráðuneytinu.
Mörgum er enn í fersku minni þegar hópslagsmál brutust út á milli rússneskra og enskra stuðningsmanna í Marseille á Evrópumótinu 2016. Margir slösuðust í átökunum sem vörpuðu dökkum skugga á annars vel heppnað Evrópumót.
Rússnesk yfirvöld hafa einnig lagt mikla áherslu á að uppræta skipulagða bulluhópa sem hafa þann eina tilgang að efna til slagsmála. Telegraph ræddi til dæmis á dögunum við Roma, rússneskan karlmann á fertugsaldri, sem tilheyrir bullum sem styðja Lokomotiv Moskvu og slást við bullur sem styðja önnur lið í Rússlandi.
Í viðtalinu lýsti hann því að lögreglan hefði afskipti af honum einu sinni í mánuði að jafnaði. Roma er einn fjölmargra Rússa sem eru á bannlista fyrir heimsmeistaramótið. Lýsti hann því að hann ætti von á þungri refsingu ef hann myndi hafa sig í frammi meðan á mótinu stendur.