HM í fótbolta hefst á morgun og af því tilefni fékk breska ríkisútvarpið, BBC, nokkra sparkspekinga til að spá fyrir um mótið. Hér að neðan má sjá mat þeirra Chris Sutton, Alex Scott og Frank Lampard um hvaða lið mun koma mest á óvart.
Chris Sutton:
„Fyrir utan England, þá held ég að Úrúgvæ muni koma á óvart. Þeir enduðu í öðru sæti í undankeppninni í Suður-Ameríkuriðlinum á eftir Brasilíu. Miðvarðarpar þeirra, Diego Godin og Joese Maria Jiminez, er ógnarsterkt og þetta eru líka leikmenn sem spila saman hjá Atletico Madrid. Þeir hafa líka leikmenn sem skora mörk, Luis Suarez og Edinson Cavani.“
Alex Scott:
„Ég ætla að segja Belgía. Undanfarin ár hefur verið talað um þá fyrir hvert einasta stórmót og það fullyrt að nú fari þeir alla leið. En munurinn fyrir þetta mót er sá að lykilmenn liðsins, gullkynslóðin svokallaða, hafa reynsluna af stórmótum. Ef þeir vilja láta til sín taka á heimsmeistaramóti þá er tækifærið núna.“
Frank Lampard
„Það búast allir við því að Argentínu og Brasilíu muni ganga vel en ég held að önnur Suður-Ameríkuþjóð muni koma meira á óvart. Kólumbíumenn eru með frábæra leikmenn og það verður mjög erfitt að vinna þá.“