Íslenska landsliðið hafði hugsað sér að taka með sér íslenskan mat a Heimsmeistarmaótið í Rússlandi en í ljós kom að það er ekki í boði.
Vegna viðskiptabanns Rússa á nokkrar íslenskar vörur getur íslenska landsliðið ekki fengið sér íslenskan mat þar í landi. Rússar settu bann á innflutning á nokkrum íslenskum vörum fyrir þremur árum eftir að Ísland mótmæli innrás Rússlands inn á Krímskaga.
,,Það þarf mikla nákvæmni í útfyllingu allra tollskýrsla, það hefur farið óhemju tími í það. Við vonum að við séum að ná því góðu núna, við tökum óhemju magn af fatnaði og tæknibúnaði með. Lyfjum og læknistækjum, það hefur farið mikill tími í það,“ sagði Klara Bjartmarz framkvæmdarstjóri KSÍ við Morgunvaktina á RÁS2 í dag.
Á Evrópumótinu í Frakklandi tóku kokkar liðsins með sér talsvert magn af mat til landsins. ,,Í Frakklandi tókum við mikið af mat með okkur, við getum það ekki núna. Við megum ekki flytja það inn.“
,,Rússneskur matur er frábrugðinn okkar mat og því sem við erum vön, fótboltafólk er ekki mjög hrifið af nýjungum rétt fyrir leik. Okkar aðalkokkur er farinn að þekkja hvað leikmenn vilja rétt fyrir leik, það þarf að bregðast við því. Við förum ekki að gefa Gylfa eitthvað vont að borða þremur tímum fyrir leik, við gerum það ekki.“