Arsenal tók á móti Atletico Madrid í fyrri leik liðanna í undanúrslitum Evrópudeildarinnar í kvöld en leiknum lauk með 1-1 jafntefli.
Sime Vrsaljko, bakvörður gestanna fékk að líta rauða spjaldið á 10. mínútu og leikmenn Atletico því einum færri en það var Alexandre Lacazette sem braut ísinn á 61. mínútu með laglegu skallamarki.
Antoine Griezmann jafnaði hins vegar metin fyrir Atletico á 82. mínútu og lokatölur því 1-1.
Danny Welbeck, framherji Arsenal var svekktur með að vinna ekki leikinn í kvöld.
„Það er mjög svekkjandi að fá á sig þetta mark undir lokin, sérstaklega þar sem að við komumst yfir,“ sagði Welbeck.
„Ég þarf að sjá markið sem þeir skora aftur en við munum skoða hvað viðgerðum rangt þar. Leikurinn er búinn og við þurfum að horfa á þetta með jákvæðum augum. Við sköpuðum helling af færum gegn mjög sterku liði.“
„Við sögðum það fyrir leikinn að vildum vinna þessa keppni fyrir Wenger og það er ennþá markmiðið, þetta einvígi er alls ekki búið,“ sagði hann að lokum.