Jurgen Klopp, stjóri Liverpool hefur biðlað til stuðningsmanna liðsins um að halda ró sinni þegar Roma mætir í heimsókn á Anfield.
Liverpool tekur á móti Roma í fyrri leik liðanna í undanúrslitum Meistaradeildarinnar á morgun klukkan 18:45 en mikil eftirvænting ríkir fyrir leiknum.
Liverpool sló Manchester City úr leik í 8-liða úrslitum keppninnar en allt varð vitlaust þegar leikmenn City mættu á Anfield og var liðsrúta félagsins lögð í rúst.
„Á vellinum, gerið það sem þið gerðuð aftur og helst betur,“ sagði Klopp og átti þar við stemninguna á vellinum.
„Fyrir utan leikvanginn, vinsamlegast sýnið þá virðingu sem við eigum að sína. Þetta er stórkostlegt knattspyrnufélag og ein stór fjölskylda sem er þekkt fyrir magnaða stemningu á heimaveli sínum. Við þurfum ekki að kasta aðskotahlutum í liðsrútu andstæðinga okkar.“
„Þeir eiga skilið virðingu, við erum andstæðingar inni á velinum en ég tel þetta vera gott tækifæri fyrir okkur til þess að sýna umheiminum hversu yndislegt fólkið frá Liverpool er. Sýnum okkar rétta andlit og heimurinn mun taka eftir því. Félagið á það skilið og allir sem koma að því,“ sagði Klopp að lokum.