Mohamed Salah, sóknarmaður Liverpool var í kvöld valinn besti leikmaður ensku úrvalsdeildarinnar.
Það eru leikmenn í ensku úrvalsdeildinni sem velja besta mann deildarinnar í þessu kjöri en Salah hefur verið magnaður á þessu tímabili.
Hann kom til Liverpool frá Roma síðasta sumar og er markahæsti leikmaður deildarinnar með 31 mark.
Salah er búinn að jafna met þeirra Alan Shearer, Cristiano Ronaldo og Luis Suarez yfir flest mörk skoruð í 38 leikja deild.
Það eru ennþá þrír leikir eftir af tímabilinu og verður að teljast afar líklegt að Salah muni bæta metið áður en tímabilið klárast.