,,Ég er mjög fljótur upp og mjög lengi niður,“ segir Ragnar Sigurðsson varnarmaður íslenska landsliðsins í fótbolta og Rostov í Rússlandi við RÚV.
Þetta kom fram í þættinum Draumurinn um HM sem var sýndur á RÚV í kvöld.
Ragnar kveðst eiga í vandræðum með að stjórna skapi sínu en hann verður í lykilhlutverki þegar liðið leikur á Heimsmeistaramótinu í Rússlandi í sumar.
,,Þegar eitthvað gerist þá þarf ég helst að fá að vera einn einhvers staðar, þetta hefur verið stórt vandamál í mínu lífi,“ segir Ragnar sem fer ekki í felur með galla sína, ef galla má kalla.
,,Þó að það sé kannski fyndið að tala um þetta í einhverju djóki, þá er þetta ekki jákvæður hlutur. Ég vildi óska þess að þetta væri ekki svona, það gengur ekki alveg að láta skap stjórna svona stórum hluta af lífi sínu.“
Ragnar segir að stjórn hans á skapinu hafi ekki batnað með árunum en hann er 31 árs gamall. ,,Mér finnst þetta ekki vera að skána neitt. Ég er að vinna með þetta í dag í fyrsta sinn, ég hef aldrei unnið neitt með þetta áður. Ég held að þetta sé stór hluti af þeim persónuleika af þeim sem þekkja mig. Í stóru myndinni er þetta ekkert jákvætt.“