Willy Boly, leikmaður Wolves á Englandi, er mjög öflugur í tölvuleiknum vinsæla FIFA sem gefinn er út á hverjum ári. Leikurinn snýst um það eina að spila knattspyrnu.
Wolves er með tvo atvinnumenn í leiknum á samningi þá Torin Page og Flavio Brito sem eru afar góðir í leiknum og spila fyrir hönd Wolves í rafíþróttum.
Þeir mættu á æfingasvæði Wolves á dögunum og fengu að spila við þá Matt Doherty og einmitt Boly.
Doherty tapaði fyrir Brito nokkuð sannfærandi en Boly kom öllum á óvart og vann atvinnumanninn Page.
Doherty viðurkennir að hann hafi ekki vitað af þessum hæfileikum samherja síns sem er augljóslega mjög góður spilari.
,,Kannski er möguleiki á öðrum ferli fyrir Boly, hann gæti skrifað undir tvo samninga hjá Wolves,“ sagði Doherty.
,,Hann hlýtur að spila FIFA mjög mikið í sínum frítíma. Ég held að hinn spilarinn hafi ekki náð skoti á markið.“
,,Þetta hlýtur að hafa verið góð tilfinning því ég held að Boly spili ekki eins mikið og atvinnumaðurinn sem spilar í níu til tíu klukkutíma á dag – þetta er starfið hans.“
,,Þetta hefur alveg farið framhjá okkur. Við vissum ekki að Boly spilaði FIFA.“