Hlaðvarpsþátturinn, 90 mínútur hefur hafið göngu sína en um er að ræða þátt sem Hörður Snævar Jónsson, ritstjóri 433.is stýrir.
Rætt verður um fótbolta við áhugaverða gesti í vetur, farið verður um víðan völl.
Næsti gestur þáttarins er Theodór Elmar Bjarnason, landsliðsmaður í knattspyrnu.
Elmar var síðast á mála hjá liði Elazigspor í Tyrklandi en liðið leikur í næst efstu deild þar í landi.
Það eru ýmsar reglur í Tyrklandi sem þekkjast ekki annars staðar og er horft öðrum augum á atvinnumennsku.
Elmar þarf til að mynda að vera á æfingasvæðinu í fimm tíma í hvert skipti en menn mega ekki fara fyrr heim.
,,Þeir líta öðrum augum á atvinnumennsku kannski, þeir treysta ekki mönnum til að passa upp á sjálfan sig nógu vel,“ sagði Elmar.
,,Kannski skiljanlega með slæmar upplifanir fyrr um árin en þú þarft að hanga á æfingasvæðinu, mættur klukkan tíu og mátt ekki fara heim fyrr en klukkan þrjú.“
,,Þú ert ekki að gera neitt, þú liggur bara upp í rúmi, starandi upp í loftið í símanum, það er ekkert að gera þarna.“
,,Svo þarftu að vera mættur tveimur dögum fyrir leik og hanga á æfingasvæðinu og sérð fjölskylduna þína oft ekki í tvo til þrjá daga í viku.“
Það þótti skemmtilegt á yngri árum en Elmar á fjölskyldu í dag og viðurkennir að það taki á að vera svo lengi í burtu.
,,Áður en maður eignaðist fjölskyldu og barn þá var geggjað að fara í tveggja til þriggja vikna æfingaferð.“
,,Núna kemur upp þessi söknuður þar sem maður er tvær til þrjár vikur, tvisvar eða þrisvar á ári í burtu frá fjölskyldunni.“
,,Maður fær vel greitt fyrir þetta starf en ferillinn er stuttur og maður þarf að hugsa vel um þetta.“
,,Á fyrri árum þá eyddi ég tíu tímum í dag frá því ég var átta ára þar til ég fór í atvinnumennsku í fótbolta. Ég fór ekki í partý með vinunum svo maður fórnaði ýmsu á unglingsárunum.“
,,Þetta er oft dans á rósum en andlega þá getur þetta verið erfiðara en eitthvað líkamlegt. Andlega er oft upp og niður í þessu.“
Meira:
Bróðir Elmars tók sitt eigið líf: ,Ég myndi ekki óska þess upp á minn helsta óvin að ganga í gegnum lífið, líðandi svona“
Elmar eyddi um efni fram og lifði á núðlum: ,,Það var oftar en einu sinni að maður átti ekkert til“