Steven Gerrard var frábær miðjumaður á sínum tíma en hann lék allan sinn feril með liði Liverpool.

Gerrard er af mörgum talinn einn besti leikmaður í sögu Liverpool en það kom aldrei til greina að hann myndi spila fyrir annað félag.

Faðir Gerrard er mikill aðdáandi Liverpool en hann sá son sinn klæðast treyju Manchester United er hann var 11 ára gamall.

Gerrard lék sér í fótbolta ásamt vini sínum sem átti United treyju merkta Bryan Robson sem var miðjumaður United á þeim tíma.

Gerrard fékk að klæðast treyjunni er þeir léku sér saman, eitthvað sem faðir hans var alls ekki hrifinn af.

,,Vinur minn átti treyju merkta Bryan Robson, þessa gömlu bláu og hvítu treyju,“ sagði Gerrard.

,,Við vorum að spila saman og ég spurði hann hvort ég mætti vera Robson í stutta stund.“

,,Ég fór úr Liverpool treyjunni og klæddi mig í Robson treyjuna. Mér leið frábærlega og klæddist henni í klukkutíma.“

,,Ég hljóp út um allt, tæklaði mikið og skoraði hetjuleg mörk. Ég þóttist vera Robson.“

,,Því miður fyrir mig þá leit pabbi minn út um gluggann og gjörsamlega klikkaðist.“

,,’Komdu þér inn núna!’ öskraði hann á mig. Ég gerði það og fékk svo að heyra það: ‘Hvað í andskotanum ertu að gera, að klæðast Manchester United treyju?“

,,Ég útskýrði að þetta væri treyja Bryan Robson. Honum gat ekki verið meira sama og sagði að ég ætti að vita betur.“