Fyrrum leikmaður Manchester City, Courtney Meppen-Walter, er á leið í fangelsi á nýjan leik eftir að hafa verið handtekinn í nótt.

Meppen-Walter var talinn efnilegur leikmaður á sínum tíma en hann var handtekinn í febrúar árið 2013.

Hann klessti þá Mercedes bifreið sína á miklum hraða sem varð til þess að systkinin Kulwant Singh og Ravel Kaur létu lífið.

Systkinin voru saman í Nissan bifreið sem Meppen-Walter klessti á og var sökudólgurinn í kjölfarið handtekinn fyrir hraðakstur.

Hann var dæmdur í 16 mánaða fangelsi aðeins 18 ára gamall en var hleypt út fjórum mánuðum síðar.

Meppen-Walter var svo handtekinn aftur í nótt en hann keyrði undir áhrifum áfengis í miðborg Manchester.

Hann neitaði í kjölfarið að stíga úr bílnum og var dreginn út. Tveir gangandi vegfarendur þurftu að hjálpa til við að koma manninum í bíl lögreglunnar.

Samkvæmt fregnum er Meppen-Walker á leið í sex mánaða fangelsti en hann viðurkenndi að hafa verið drukkinn undir stýri.

Hann hefur undanfarið verið að spila með liði Chorley í utandeildinni á Englandi en ferillinn fór hratt niður eftir atvikið árið 2013.