Erfiður ári hjá karlalandsliðinu í knattspyrnu er lokið en liðið vann ekki leik á alþjóðlegum degi. Ekki má þó gleymast að liðið spilaði í fyrsta sinn á Heimsmeistaramótinu, lang minnsta þjóðin sem hefur afrekað að taka þátt í stærsta íþróttaviðburði í heimi.
Erik Hamren tók við þjálfun liðsins í sumar þegar Heimir Hallgrímsson ákvað að stíga til hliðar, Freyr Alexandersson er hans aðstoðarmaður.
Freyr fór í viðtal við Fótbolta.net í upphafi vikunnar þar sem hann ræddi um umræðu á samfélagsmiðlum og hvernig hún getur orðið.
„Ef leikmenn eiga kafla þar sem þeir spila ekki vel þá eru menn oft dæmdir og sagðir ljótir hlutir um þá. Þetta fylgir bransanum. En ég vildi ekki vilja sleppa umfjölluninni sem er kringum liðið. Íslendingum þykir gríðarlega vænt um íslenska landsliðið og þannig á það að vera. Þess vegna skapast þessi umræða,“ sagði Freyr í viðtali við Elvar Geir Magnússon á Fótbolta.net í upphafi vikunnar.
„Þetta er þannig að síðasta fíflið er ekki fætt. Það verður alltaf einhver leiðindaumræða og fólk sem kallar á athygli með neikvæðum,“ sagði Freyr en þessi ummæli hans hafa vakið umræðu.
Ingólfur Sigurðsson fyrrum unglingalandsliðsmaður í knattspyrnu er ekki hrifin af því hvernig Freyr talar til þeirra sem horfa á liðið.
,,Lítill klassi hjá landsliðsþjálfara að tala um að „síðasta fíflið sé ekki fætt“ þegar kemur að neikvæðri umræðu um landsliðið,“ skrifar Ingólfur á Twitter og hefur fengið sterk viðbrögð vegna þess.
,,Stuðningsmenn og fjölmiðlar sem hafa elt liðið út um allan heim eiga meiri virðingu skilið en þetta. Fyrir utan að umfjöllunin hefur verið mjög saklaus.“
Lítill klassi hjá landsliðsþjálfara að tala um að „síðasta fíflið sé ekki fætt“ þegar kemur að neikvæðri umræðu um landsliðið. Stuðningsmenn og fjölmiðlar sem hafa elt liðið út um allan heim eiga meiri virðingu skilið en þetta. Fyrir utan að umfjöllunin hefur verið mjög saklaus.
— Ingólfur Sigurðsson (@ingolfursig) November 20, 2018