Guðni Bergsson, formaður KSí mun reyna að ná endurkjöri þegar kosið verður til formanns KSÍ í febrúar á næsta ári.
Guðni náði kjöri fyrir tæpum tveimur árum og vill halda þeirri vinnu áfram. Eins og alltaf í svona starfi er gagnrýni á störfin og Guðni veit af því.
„Maður reynir að takast á við gagnrýnina og takast á við uppbyggilega gagnrýni og læra af henni. Það er hluti af þessu starfi og er svona og mun alltaf vera svona. Það er ekkert mál fyrir mann að taka því,“ segir Guðni við RÚV.is.
Háværar raddir eru í gangi um að Geir Þorsteinsson muni reyna að fá starfið aftur, hann lét af störfum fyrir tæpum tveimur árum. Guðni hefur ekki heyrt af því að hann eða aðrir muni bjóða sig fram.
„Nei, ég hef ekki heyrt af neinu enn sem komið er. Ég er nú ekki að velta því mikið fyrir mér, satt best að segja. Það er annarra að spá í það. Ég er bara að horfa til þess að fara fram í febrúar og hlakka til þess.“