Gary Neville, fyrrum leikmaður Manchester United, hefur opnað sig um tímann er hann var að brjóta sér leið inn í aðallið félagsins á sínum tíma.
Markvörður United var Peter Schmeichel á þeim tíma en Daninn var vanur að vinna með sömu fjórum varnarmönnum fyrir framan sig.
Hann tók alls ekki vel í það þegar Neville byrjaði að spila og kom hræðilega fram við bakvörðinn á æfingum.
,,Þeir voru mjög harðir já. Þegar ég komst fyrst í aðalliðið 18 eða 19 ára gamall þá var Peter Schmeichel mjög oft harðorður,“ sagði Neville.
,,Við tölum saman í dag og við hlæjum að þessu en á þessum tíma þá var hann mjög grófur.“
,,Hann var ekki mjög hrifinn af mér sem leikmanni. Schmeichel var markvörðurinn og vörnin var skipuð Bruce, Pallister, Parker og Irwin, goðsagnarkennd varnarlína.“
,,Ég var sá fyrsti til að brjóta mér leið inn í liðið og hann sá það sem áhættu, hann hugsaði að þetta gæti haft stór áhrif á hversu sigursælt liðið hafði verið.“
,,Paul Parker meiddist og ég byrjaði að spila í hægri bakverði, sem ungur leikmaður þá ertu ekki fullkominn. Þú gerir nokkur mistök og hann hraunaði yfir mig á æfingum, hann gagnrýndi varnarvinnuna og fyrirgjafir.“
,,Hann æfði fyrirgjafir og stóð hjá vítapunktinum, hann greip fyrirgjafirnar og sagði að þetta hafi verið glatað. Hann gerði það reglulega og var bara mjög harður og hræðilegur við mig.“