Knattspyrnumenn lifa yfirleitt mjög góðu lífi en það kemur upp að leikmenn lendi í töluverðum vandræðum hjá nýju félagi.
Alex Song, fyrrum leikmaður Arsenal og Barcelona, er einn af þeim sem hefur lent í slíku.
Song spilar í dag með liði Sion í Sviss en var áður í tvö ár hjá Rubin Kazan í Rússlandi þar sem vandamálin voru svo sannarlega til staðar.
Song segir að félagið hafi ítrekað logið að sér og þurfti hann að búa á æfingasvæði félagsins því hann fékk ekki húsnæði.
,,Þegar ég skrifaði fyrst undir þá var mér sagt að ég myndi fá húsnæði,“ sagði Song við the Telegraph.
,,Svo liðu margir mánuðir og ég var ekki með húsnæði. Þeir hentu mér út af hótelinu og ég bjó á æfingasvæðinu.“
,,Það var þremur mánuðum eftir að ég kom til Kazan. Þeir sögðu mér að ég þyrfti að bíða eftir að húsið væri tilbúið.“
,,Einn daginn ræddi ég svo við konu sem átti að vera að hanna húsið og hún sagði að enginn frá félaginu hefði haft samband.“
,,Æfingasvæðið var allt í lagi en það er ekki eins og að búa heima hjá þér. Það var líka verra en á hótelinu.“
,,Þá geturðu alltaf komist burt og hugsað um aðra hluti. Herbergið mitt á æfingasvæðinu var allt í lagi en það var ekki heilbrigt að búa þar. Þú getur ekki slakað á, allir aðrir voru með húsnæði eða voru farnir annað.“
,,Ég eyddi öllum mínum tíma í herberginu og kveikti ekki ljósin. Ég sat bara þarna með tölvuna. Ég kveikti ekki á sjónvarpinu því ég skil ekki rússnenskt sjónvarp. Lífið mitt var sími og tölva.“
,,Kazan er flottur staður. Það eru góðir veitingastaðir þarna og gott fólk en ég fór eiginlega aldrei út því ég átti enga vini.“
,,Ég sat bara þarna. Ég fór kannski tvisvar eða þrisvar út að borða. Ég borðaði annars bara á æfingasvæðinu. Maturinn var fínn en ég var einmanna. Ég var að verða klikkaður. Ég grét ekki en var mjög stressaður.“