Sögur eru farnar á kreik um að Geir Þorsteinsson, fyrrum formaður KSÍ íhugi að bjóða sig aftur fram í starfið á næsta ári.
Guðni Bergsson var kjörinn formaður KSÍ árið 2017 en í byrjun næsta árs verður aftur kosið um formann. Guðni mun sækjast eftir endurkjöri en líkur eru á að hann fái mótframboð.
Þórir Hákonarson, fyrrum framkvæmdarstjóri KSÍ ræddi um málið í Fótbolta.net á X977 á laugardag. Þar var nafn Geirs nefnt til sögunnar.
,,Ég held að það séu ágætis líkur, hvað er hann að gera? Þetta er gæi sem vill hafa áhrif, hann vill hafa áhrif og er ungur að árum. Guðni hefur fengið sín tvö ár, það hafði enginn trú á því að Geir myndi vinna Guðna, svo hann steig til hliðar. Svo er Guðni bara ekkert búinn að gera þessa tvö ár,“ sagði Mikael Nikulásson um málið í Dr. Football í gær, hlaðvarpsþættinum vinsæla.
Hjörvar Hafliðason sem stýrir þættinum var ekki sammála. ,,Hvað áttu við að hann sé ekkert búinn að gera? Er ekki íslenskur fótbolti bara í frábærum málum?,“ spurði Hjörvar og Mikael var ekki lengi að svara.
,,Það er sennilega Geir að þakka að mestu leyti, yfirmaður knattspyrnumála og fleira. Það er lítið búið að gerast hjá Guðna.“
Kristján Óli Sigurðsson spurði þá hvað Guðni hefði gert fyrir litlu liðin í landinu, hann hefði lofað því. ,,Ekki neitt, það er ekkert búið að gerast,“ sagði Mikael.
,,Geir getur sagt núna, hann fékk tvö ár. Gerði hann eitthvað betur en ég? Ég ætla bara að prufa.“
,,Geir fannst þetta gaman og hann telur sig geta unnið þetta, af hverju á hann að hugsa um einhvern annan en sjálfan sig? Ég held að Geir eigi meiri möguleika á að vinna Guðna árið 2019 heldur en 2017. Djöfull væri gaman ef hann kæmi aftur.“
Hjörvar telur að formaður KSÍ þurfi meira en tvö ár til að berja sínum áherslum í gegn. ,,Ég held að það taki meira en tvö ár að máta sig við þetta, til að breyta hlutum.“
Umræðan er hér að neðan.
