Það er alls ekki ólíklegt að stórlið í Evrópu muni reyna við framherjann Josef Martinez, leikmann Atlanta United á næsta ári.

Martinez hefur spilað með Atlanta undanfarið ár en hann kom til liðsins frá Torino á Ítalíu á síðasta ári.

Síðan þá hefur Martinez raðað inn mörkum og skoraði í kvöld sitt 27. mark á tímabilinu en hann hefur spilað 25 leiki.

Martinez hefur samtals gert 46 mörk í 45 leikjum í Bandaríkjunum sem er mögnuð tölfræði.

Martinez jafnaði markamet MLS deildarinnar í kvöld en það stendur í 27 mörkum. Roy Lassiter, Chris Wondolowski og Bradley Wright-Phillips náðu allir því afreki.

Martinez mun hins vegar pottþétt bæta það met en hann á enn eftir að spila níu leiki í deildinni.

Þessi 25 ára gamli leikmaður skoraði aðeins sjö mörk í 58 leikjum fyrir Torino á þremur árum en hann hafði fyrir það leikið í Sviss.