Það hefðu væntanlega allir fyrirgefið leikmönnum japanska landsliðsins ef þeir hefðu yfirgefið Rostov Arena í flýti eftir svekkjandi tap gegn Belgíu, 3-2, í 16-liða úrslitum HM í gærkvöldi.
Japan komst 2-0 yfir í seinni hálfleik en ótrúleg seigla Belga skilaði þeim mögnuðum 3-2 sigri þar sem sigurmarkið kom í uppbótartíma.
Japanir voru skiljanlega sárir og svekktir og sáust sumir þeirra gráta úti á velli þegar dómarinn hafði flautað til leiksloka.
Umgengni í búningsklefum liða hefur stundum verið tilefni til vangaveltna og þykir sumum umgengni knattspyrnumanna ekki beinlínis vera til fyrirmyndar. En Japanir eru sér á báti hvað þetta varðar og hafa þeir fengið mikið lof fyrir það hvernig þeir skildu við búningsklefann eftir leikinn í gærkvöldi.
Ekki eitt einasta rusl var á gólfinu og þá höfðu leikmenn skilið eftir lítinn miða þar sem aðstandendum mótsins var þakkað fyrir hlýjar móttökur. Það var Priscilla Janssen, starfsmaður FIFA, sem birti meðfylgjandi mynd á Twitter-síðu sinni.
Þó að tapið hafi verið svekkjandi sáu Japanir enga ástæðu til að gera starfsfólki vallarins starfið erfiðara en það þurfti að vera. „Frábært fordæmi sem þeir setja fyrir önnur lið. Heiður að vinna með svona liði,“ sagði Priscilla.
Það eru ekki bara leikmenn Japans sem hafa verið til fyrirmyndar hvað þetta varðar. Stuðningsmenn á áhorfendapöllunum hafa sést aðstoða starfsfólk við að taka til í stúkunni eftir að leikjum lýkur. Mættu fleiri svo sannarlega taka sér þetta til fyrirmyndar.