„Þetta var bara góðlátlegt grín og átti ekki að ná neitt lengra,“ sagði varnarmaðurinn Kári Árnason á blaðamannafundi íslenska landsliðsins í Kabardinka í morgun.
Kári var þar spurður út í hópmynd af landsliðinu sem hann setti á Instagram áður en liðið hélt af landi brott áleiðis til Rússlands. Kári merkti myndina „sexyrurik“ og var hann spurður að því hvort hann ef til vill séð eitthvað fyrir hvað varðar vinsældir Instagram-stjörnunnar Rúriks Gíslasonar. Eins og alþjóð veit er Rúrik nú kominn með milljón fylgjendur á Instagram en fyrir mót voru þeir 30 þúsund.
„Það er ekkert að sjá fyrir að sjá að Rúrik sé sexy. Það sjá það allir held ég. Þetta var bara góðlátlegt grín og átti ekki ná að neitt lengra. Ég held að þetta hafi ekki verið kveikjan að neinu, ég held að fólk hafi bara séð þetta með eigin augum,“ sagði Kári sem sagði einnig á fundinum að hann væri ánægður fyrir hönd liðsfélaga síns. Rúrik væri þó með einbeitinguna á landsliðinu en ekki frægðinni á Instagram.
„Ég held að hann sé ekki að einblína á það – þetta skiptir ekki máli. Þegar fótboltanum lýkur þá fer hann líklega í fyrirsætustörfin. Vonandi getur hann nýtt sér það.“