ÍBV hefur fengið til sín sóknarmanninn Guy Gnabouyou en þetta tilkynnti félagið nú rétt í þessu.
Um er að ræða 28 ára gamlan leikmann en hann er alinn upp hjá franska stórliðinu Marseille og lék fyrir aðallið félagsins.
Gnabouyou spilaði síðast með enska félaginu Torquay en liðið leikur í einni af utandeildunum á Englandi.
Einnig hefur framherjinn spilað fyrir lið á borð við Inter Turku í Finnlandi og Silema frá Möltu.
Gnabouyou var á sínum tíma talinn efnilegur leikmaður og spilaði leik fyrir sterkt U21 landslið Frakka.
Það verður spennandi að sjá hvernig fer hjá Frakkanum í Eyjum en ÍBV hefur leik í Pepsi-deild karla á morgun gegn Blikum.